czwartek, 30 lipca 2015

Napasztowŏł...

Zicło sie dwiōch chopa we kinie i łoglōndajōm fylm. Przed niymi łozsiadło sie srogachne, glacate, wyrośniōne „dresisko”, taki nasz dŏwny huncwot i chachŏr. Bez dwa myjtry wzrōstu, 120 kilo żywyj wŏgi i take tam jesce. Słōwym: kyns dresiŏrza. Jedyn ze tych dwiōch kamratōw rzōńdzi:
– Te, stary, wetna sie ze cia ło 50 złociokōw, iże niy praskniesz tego frica sam przed nami w glaca!
Tyn drugi pomedikowŏł deczko i łodrzykŏ:
– Niy ma sprawy. Jŏ za 50 złociokōw praskna tego dresiŏrza bez łeb.
Nō, i prasknŏł tego istnego bez palica.
Tyn istny glacok łobrŏcŏ sie, a tyn, co go prasknōł rzykŏ ku niymu:
– Serwus Erwin! Kopa lŏt! Co tam u cia?
Tyn dresziŏrz letko sie wkurwiōł i gŏdŏ:
– Suchej ino stary, tyś mie pewnikym ze kimsik inkszym pomylōł. Ślatuj OK!
Minōła dugszŏ kwilka i juzaś tyn piyrszy ze kamratōw rzŏńdzi ku tymu drugimu:
– Wiysz, prasknōńć tego lōmpa rōłz, to żŏdne mecyje. Wetna sie ze cia ło cŏłke sto złocioków, iże niy zrobisz tego drugi rōłz.
Tyn drugi kamrat pomedikowŏł łoka mrzik i łodrzykŏ:
– Niy trop sie. Za stōwa praskna ci go jesce rōłz.
I juzaś dupnōł bez łeb tego glacoka. Tyn sie juzaś łodwrŏcŏ, już festelnie wkurwiōny, i słyszy:
– Erwin! To przecamć jŏ! Do jednyj klasy we szuli łoba my deptali. Na isto mie niy poznŏwosz?
Tymu istnymu szōminy wyleźli na gymba i cedzi bez zymbiska:
– Suchej ino, kurwa, chopie. Gŏdŏłech ci już, iże mie ze kimsik mylisz, i gŏdōm prōmp... łodpierdol sie łodymie... OK?
Zatym wstowo wkurwiōny już do łostatka i przesiŏdo sie do piyrszyj raji. I juzaś śleciała kwilka i tyn piyrszy kamrat napoczynŏ trzeci rōłz swoja ryjda:
– Nō wiysz, dwa razy prasknōńć cudzego bez łeb, to tyż na isto żŏdyn kōnsztik. Tyż bych ro zrobiōł. Ale trzeci rōłz to ci sie na zicher niy udŏ. Wetna sie ze cia ło dwiesta złociokōw, co trzeci rōłz już niy wydolisz!
Juzaś kwilka pomyślōnku i tyn drugi przijimŏ weta. Wstowo, idzie do piyrszyj raji i dup glacoka we palica łod zadku. Tyn srogachny dresiŏrz srywŏ sie już na fest wkurwiōny i słyszy:
– Erwin! To ty tukej żeś sie zicnōł? A jŏ ci tam trzi raje wyżij już dwa razy napasztnōł jakigosik inkszego chopa, blank na cia podanego...

środa, 29 lipca 2015

Mierznie mi sie bez baby...

Rōłzczasu jedyn istny wlazuje do restaurantu. Łobleczōny łokludnie, ale idzie ujzdrzić, co prziłobleczynie jes deczko styrane, snoszōne. Zicnōł przi tiszu i wołŏ ōłbra. Tyn podlazuje ku niymu, a tyn istny pytŏ sie go:
– Wyboczōm mi łōni, a fisze to u wŏs sōm, ja?
– Snadnōm rzeczōm, sōm. Laks, znaczy sie łosoś, tunfisza, forela, znaczy pstrōng... i inksze...
– Niy, niy... Jŏ bych sie zawinszowŏł jakigosik mintaja, abo cosik takigo... jak nŏjgorszyjszego i blank niyfrisznego...
Kelner deczko zadyrgotŏł ze łobrzidzyniŏ, ale niyzrōszōny rzōńdzi:
– Dobra, robi sie... zarŏzki wtosik pylnie sie do... zupermarkytu!
Nō, tōż tyn istny gŏdŏ dalszij:
– I prosza wŏs panoczku, coby narychtować ta fisza na szpecijalny szimel...
– Suchōm wŏs?
– Jŏ bych sie winszowŏł, coby łónyj niy szpluchtać, niy łozmrŏżać, niy snożyć...
– Ale...
– Dużo soli! – rzōńdziōł dalszij tyn istny. – Ale ino ze jednyj zajty. Za to ze drugij mocka korzyni, tak łod syrca. I kciŏłbych coby jōm kuchŏrz skwarził bez łolyju. Wiedzōm łōni, tak ganc ajnfach ciepnōńć na tyglik i przibrōnocić, spŏlić ze jednyj zajty. Za to drugŏ mŏ być blank surowŏ...
Kelner blank łosupiŏły prōbuje sie wycofać, ale tyn istny go zahaltowŏł:
– I jak ci już bydōm mi łōni, panie ōłber, ta fisza podŏwać, to prosza bez żŏdnych mecyji, bez żŏdnego „smacznygo”, bez „prosza piyknie” abo inkszych takich.. Ciepnōm mi łōni talyrz na stōł i wrzesknōm: Żrij... kurwa!
Lelner łodwrŏcŏ sie, zatym wypŏłniŏ gynał, dicht polecyniŏ kōntmana. Tyn istny ze płaczkami we ślypiach wciskŏ mu do gorzci banknota 200 złociokōw i rzōńdzi”
– Miarkujesz pōn, jŏch już jes trzeci tydziyń na dinstrajzie... Stopierōńsko mi sie ckni ku mojij staryj!

wtorek, 28 lipca 2015

Bryna...

Zwōnek przi dźwiyrzach... Baba łozewrziła, a sam zarŏzki za szwelōm, za progym styrcy fechciŏrz.
– A dziyń dobry paniczko! Eźli retli by łōni paniczko chudobnygo czowieka kōnskym chleba?
Baba tak kukła na tego fechciorza litōściwie i rzōńdzi ku niymu:
– Óooo, widzōm łōni! Razinku upiykłach torta, tōż tyż dōm wŏm kōnszczek.
– Niy! Niy! Bydōm tak dobrzi i sie niy trŏpiōm. Mie suchy chlyb blank styknie.
– Nale, panoczku, przecamć jutro moge sie przitrefić taki fal mie i wtynczŏs możno łōni panoczku mie holfnōm.
Po dugszym czasie i dyszkusyji tyn fechciorz na łostatku zgodziōł sie wziōńć tyn kōnsek torty. Idzie śniym we gracy bez hulica i mrōncy pod fusiskym:
– Tortnsztikel! Kurwa... tortnsztikel! A na chuj mi tyn tortnsztikel? Jak jŏ do kurwy nyndzy bez niygo moja halba bryny przepuszcza???

poniedziałek, 27 lipca 2015

Dziŏd i baba...

Byli se rŏłz stary chop i jejigo małowiela modszŏ baba. Rōłzczasu babie zakciało sie dupczyniŏ, tōż tyż napoczła zolyty, kabacynie, motanie... nō robiōła wszyjsko, coby chopa zakludzić do prykola. A chop nic a nic. Blank niy miŏł gyfilu, blank niy miŏł chańdzi na prykolowe wyrobianie.
Nō tōż snerwowanŏ baba pokwanckała sie do dochtora i rzōńdzi:
– Pōnie dochtorze! Jŏ bych fōrt kciała dupczyniŏ a mōj chop blank niy. Cōż jŏ mōm robić?
– Spokōjnie, niy nerwyjs. Jŏ mōm na to knif. Musicie paniczko na minutka skorzij przijńściŏ chopa ze roboty do dōm seblyc batki i stanōńć sie zadkym ku dźwiyrzōm, ugibać sie deczko i wypnōńć rzić a zarŏzki łobudzi sie we waszym chopie dzike zeksualne zwiyrze.
Nō,tōż baba zrobiōła jak przikŏzŏł dochtōr. Z wypniyntōm rziciōm czekŏ... nō i na łostatek zmŏchany, usiotany chop wrŏcŏ ze roboty, łozewrził dźwiyrze, kuknōł tak, zaziyrŏ... i w te pyndy zapierdala wiela ino mŏ siył w nogach do nŏjbliższyjszygo szynku. Wkarowŏł wartko rajn, zicnōł sie przi szynkwasie łobsztalowŏł piyrszŏ seta, drugŏ, trzeciŏ... Wysłepŏł już ze dwie halbecki, ale łōn dalszij sztaluje. Na to gospodzki ze rułōm:
– Panoczku! A rzyknijcie mi ino czamu łōni tak bez łopamiyntaniŏ słepiōm? To już trzeciŏ flaszka... nō, rzyknij pōn po jakiymu?
– Panie ōłber! Wrŏcōm usiotany, zmorzōny, blank kaput do dōm po cŏłkim dniu bakaniŏ we robocie, wlazuja na mōj sztok, łozewrziłech dźwiyrze... a sam troll, myjter na pōłtora, kracer, szrama na pōłowa pyska, broda do kolańskōw i jesce mu ze mordy ślina ściykŏ...

piątek, 24 lipca 2015

Trzi mrowce...

Byli se trzi mrowce, trzi mrōwki. Jedna mrōwka polazła do kichola, drugŏ pokwanckała sie do dakla, a trzeciŏ... wlazła do dupy. Po jakimsik łoka mrziku piyrszŏ śnich wylazła i gŏdŏ:
– Bōłach we kicholu i przismycyłach ze sia ździebko klyju, lepidła.
Na to drugŏ rzōńdzi:
– Jŏ bōłach we daklu i mōm małowiela... miodu.
A na to wszyjsko trzeciŏ rzykŏ:
– Joch bōła w dupie i blank nic’ech niy prziniysła, bo jakosik czŏrnŏ damfmaszina mie... gōniōła!

czwartek, 23 lipca 2015

Takŏ antynka...

Na plaży leży szykownistŏ, modŏ i blank sagŏ blōndina. Wele nij legnōł jedyn istny. Kciŏłby, a le blank niy wiy jak sie dō łōnyj dobrać. Markiyruje, iże kce nasztalować radijok.
Łorŏz jejigo graca landuje na jeji basisku.
– Jezderkusie! Co łōni panoczku robiōm?
– Anō, prōbuja chycić... Francyjŏ...
Dziołcha kukła, gynał badła na jejigo batki i rzōńdzi:
– Panoczku! Ze takōm antnkōm to pōn Warszawy niy łapnie!

środa, 22 lipca 2015

Co sie dziyje...

Do jednego istnego na hulicy podlazuje uciorany, zaszmodrany i festelnie skacowany wulc i rzōńdzi tym swojim sznapsbarytōnym:
– Panoczku! Retnij mie pōn! Fechtuja na jŏdło. Dej pōn pŏra ceskich!
– Ło niy! Pewnikym, zarŏzki lajstniesz sie pōn halbecka... niy ma mōwy!
– A dyć kaj tam! Jŏ już łod dŏwna niy słepia!
– Jaaaa? To pewnikym grŏsz pōn w karty!
– Panoczku roztomiyły! Jŏ sie sie brzidza, jo niy ciyrpia hazardu!
– Nō, to na isto wydŏsz pōn wszyjske pijōndze na baby.
– A dyć kaj tam! Jŏch jes wiyrny mojij ślubnyj babeczce... jŏ mōm na isto festelny głōd!
Na to tyn napsztniynty chop:
– Nō, tōż panoczku jadymy ku mie, do mojij chałpy. Moja babeczka narychtuje wieczerzŏ i zjysz pōn snami...
Na to tyn wulc, tyn lōmp prōbuje do łostatka metlać:
– Ale, kuknōm sie ino panoczku, jak jŏ wyglōndōm. Waszŏ baba niy wpuści mie ani do pomiyszkaniŏ... dej pōn pŏra złocioków i jŏ zarŏzki sie straca!
– Jedzie pōn symnōm i niy ma gŏdki! Jo musza pokŏzać mojij babie co sie dziyje ze czowiekym, ftory niy słepie, niy grŏ we karty i niy lŏtŏ za babami!!!

wtorek, 21 lipca 2015

Umyj sie...

Do naszego Antka Pośpiycha przikludziōła sie ekipa telewizyjnŏ, coby spytać sie go, jak tyż to łōn doszŏł do takij srogij wydajnōści mlyka łod jejigo krōłwy.
– Jŏ, to tam nic niy wiym, niy miarkuja –gŏdŏ Antek. – Mojimi krōłwami zajimŏ sie zawdy moja starŏ.
– Nō, tōż zawołejcie jōm godpodŏrzu, zrobiymiy śniōm take małe „interview” krōtki ankyta.
– Jagna! A pōdź sam ino pierōnô!
– Czego, gupolu?
– Panoczki ze telewizyji kcōm ci zrobić jakesik interwju...
– Ato co za diosek? Co to taligo?
Gynał niy miarkuja ale lepszij by bŏł kejbyś sie łoszpluchtała, grōmtnie... podmyła!

poniedziałek, 20 lipca 2015

Sztynder....

Zwiykowanŏ wsiowŏ baba miała jedna krōłwa. Nō i pomyślała, iże nŏjwyższy czŏs, coby ta jałōwka sie łocielōła. Tóż tyż łobsztalowała „inseminatora” coby tyj krōłwie zrobiōł dobrze i... sztucznie jōm zapłōdniōł.
Prziszŏł tyn istny, łobadŏł, łobejzdrzŏł gynał ta krōłwa i na łostatku pedziŏł ku starce:
– Prziniesōm mi łōni waszbek, zbōnek ze gorkōm wodōm, zajfa jaki handtuch.
Babinka przismycyła wszyjsko i łorŏz tyn „inseminator” zaziyrŏ a łōn idzie jesce wrōłz ze sztyndrym na łachy i biglym.
– Starceko, a rzyknōm mi łōni po jakiego dioska tyn sztynder i bigel?
– Anō, jŏ se tak myślała, cobyście panoczku mieli kaj galoty powiesić jak sie bydziecie brać do tego „zapłōdniyniŏ”!

piątek, 17 lipca 2015

Starzik we hereszcie...

Rōłzczasu zawarli do heresztu zwiykowanygo, 70 lŏt starego starzika. Tyn starzik wlazuje do celi we ftoryj jes moc dioseckich, grōźliwych zakapiorōw. Jedyn śnich zarŏzki pytŏ:
– A za cōż tyż to cie stary pryku sam zawarli?
– Anō, musisz wiedzieć, iże za szpas i zbytkowani.
– Za szpas? Za jaki kurwa szpas, za jake zbytkowani? Co ty nōs sam za bŏlek cisniesz, gŏdej zarŏzki stary knakrze za co cie zawarli, bo inkaszij to już po cia!
– Nō, to jŏ moga pokŏzać – łodrzykŏ tyn starzik.
– Nō, tōż pokŏż!
Starzik przeżegnŏł sie, wziōn kibel, ftory we celi robiōł za haźlik i klupie na dźwiyrze. Kej ino uchylōł sie judŏsz we dźwiyrzach, starzik chlistnōł tym co bōło we kiblu we tego judŏsza, łodstawiōł kibel i stanōł wele dźwiyrzy na baczność.
Po jakimsik łoka mrziku łozewrzili sie te dźwiyrza, stanōła w nich hormijŏ festelnie wkurwiōnych „klawiszōw”, w tym jedyn ufifrany gōwnami ze kibla.
Tyn ufifrany rzōńdzi:
– Tee, starzik strŏć sie kajsik do eki, coby my i tobie niy spuściyli wpierdol!

czwartek, 16 lipca 2015

Cwerg...

Rōłzczasu jednyj babie, kerŏ robiōła we biōrze jeji spōłpracownik pedziŏł, co jeji wosy festelnie fajniście wōniajōm. Ta zarŏzinku, na doczkaniu poszła ze uskarowaniym do swojigo szefa, iże jes ci sam we biōrze „molystowanŏ zeksualnie”.
– A po jakiymu paniczko tak miarkujecie? – pytŏ szef.
– Anō, bo łōn mi pedziŏł, iże moje wosy fajniście wōniajōm.
– Nō, a niy pomyśleliście paniczko, iże to mōg być łod niygo skwolka, taki kōmplymynt?
– Ja, kejś indzij bych tak ajnfach pomyślała, ale tyn istny... jes cwergym!

środa, 15 lipca 2015

Naprane...

Rōłzczasu Miymiec, Rus i Polŏk zicli we szynku przi ladze biyru ze sznapsym i napoczynajm sie stopierōńsko wadzić ło to, kaj nŏjgibcij robiōm wszelijake inwesztycyje.
– Jak jŏ jada autokym z rańca do roboty i samtukej stŏwiajōm nowŏ fabrika autokōw, to kej na drugi dziyń tōm samōm drōgōm ze werku wyjyżdżajōm już nowe autoki. – rzōńdzi Miymiec.
– To jesce wszyjsko psinco – gŏdŏ Rus. – Kej jŏ ło szaroku jada do roboty i wele mie budujōm nowy sztokowiec, betōniŏk, tōż tyż kej wrŏcōm nazŏd do dōm, to na balkōnach suszōm sie już dzieckowe powijŏki.
Na to wszyjsko rzōńdzi Polŏk:
– A u nŏs we Polsce, jak trzech archityktōw siŏdŏ do projyktowaniŏ gorzylni, to już za trzi godziny wszyjske sōm naprane jak belōwy.


wtorek, 14 lipca 2015

Srogachnŏ chaja...

We szynku łozprawiŏ jedyn istny:
Jŏ i moja starŏ poszlichmy wrōłz na srogi tref maturzystōw ze mojij szuli. Bōło to na isto wiela, wiela lŏt po tyj maturze. Przifilowŏłech, wyświdrzōłech jedna fest ci napranŏ baba, ftorŏ siedziała blank sama przi sōmsiydnim tiszu. Moja starŏ tak kukła na nia i spytała:
– Te, a to co jes? Co to za mamzela?
– Wiysz, to jes moja dŏwniyjszŏ libsta. Słyszŏłech łod kamratōw, iże kej żech jōm ciepnōł, łōna napoczła słepać gorzŏła i do terŏzka nigdy niy bōła trzyźbŏ.
Na to moja starŏ:
– Wiysz, fto by to pomyślŏł, iże czowiek moge fajrować szczysny cufal tak dugo...
Nō, i tu napoczła sie stopierōńsko breweryjŏ i srogachny krach i chaja...

poniedziałek, 13 lipca 2015

Policajt sznupie...

Rōłzczasu jedyn policajt podyjzdrzywŏł swoja baba ło niywiyrność. Skuli tego pitnōł kejsik skorzij ze roboty i wartko pojechŏł do dōm. Baba usłyszała klucz we zōmku jak leżała ze tym swojim absztyfikantym we prykolu.
– Jezderkusie! Wstŏwej wartko, mōj stary wrōciōł skorzij ze roboty. Skukej sie we szranku... samtukej!
Tyn policajt wlazuje do izby i pytŏ ze złōściōm:
– Kaj łōn jes?
– A fto, mōj chopecku?
– Anō, tyn twōj kōchanek.
– Sam żŏdnego niy ma!
– Niy ma? Prykol skiełtany, pobulōny, ty chnet blank sago... zarŏzki go znŏjda!
Zaziyrŏ do drugij izby – żŏdnego niy ma. Wlazuje do kuchyni, do badycimra – tyż żŏdneho niy ma. Na łostatku zaziyrŏ do szranku i widzi blank sagigo frica ze 100 złociokōma w gracy. Biere szlajchym, po cichuśku te 100 złociokōw do kabzy i rzōńdzi:
– Nō, i sam tyż żŏdnego niy ma...

piątek, 10 lipca 2015

Jakŏ łōn mŏ fresa...

Sprawa ło szajdōng we gyrichcie:
– Rzyknōm mi łōni paniczko, co tyż to je grōntym forladōngu, przedwojaniŏ szajdōngowego?
– Nōōō...
– Wasz chop słepie gorzŏła?
– Niy.
– A to możno biere narkotiki?
– Niy.
– Nō, tōż moż mŏ mały gyhalt, przinosi maluśki geltak?
– Niy, łōn blank dobrze zarŏbiŏ...
– A możno wasz chop wŏs paniczko piere, tłōcze we chałpie?
– Niy, łōn by sie niy łopowŏżōł mie piznōńć.
– Nō, to pewnikym niy zajimŏ sie waszymi dzieckōma?
– Zajimŏ sie, rŏd sie dzieckōma zajimŏ.
– Nō, to pewnikym wŏs paniczko zdrŏdzŏ ze inkszymi babami?
– A dyć kaj tam, niy zdrŏdzŏ.
– Nō, to na zicher niy poradzi wōm paniczko dogōdzić zeksualnie?
– Niy, ze zeksym jes wszyjsko do porzōndku.
– Tōż możno blank wōm niy spōmŏgŏ we dōmowych robotach?
– A pōmŏgŏ, robi wszyjsko, co potrza.
– Nō, tōż co jes richtik prziczynōm szajdōngu, waszygo rozwodu?
– Kejbyście Wysoki Sōndzie widzieli ta jejigo łoszkliwŏ fresa ze jakōm łōn to wszyjsko robi!!!

czwartek, 9 lipca 2015

Rogi łostali...

Rōłzczasu we gimplu, we gymnazjōm na szulsztōndzie ynglickigo Jorguś praskōł ze takij tytki na śniŏdanie. Rechtōrka tak ci sie wystraszōła, iże sie do imyntu pojscała. Zgańbiōnŏ jak sto dioskōw wypolōła ze klasy i tela jōm widzieli. Afyra na cŏłkŏ szkoła. Dyrechtor zawōłŏł do szuli Jorgusiowego łojca i tak ci mu wszyjsko tuplikuje:
– Wiedzōm łōni panoczku, ta rechtorka to nŏjlepszyjszŏ pedagog bŏła samtukej u nŏs. Mŏ spanialisty kōntak ze modziŏkōma, doskōnało, prima zort ynglistka śnij... Mocka nadgrodōw erbła ze ministyrstwa i ze bele kaj. Mŏcie panoczku anōng kaj my terŏzki takŏ rechtorka ze te pijōndze znŏjdymy? Muszōm łōni panoczku cosik zrobić, jakosik sprawa uholkać, łobrychtować... miarkujōm łōni – jakesik kwiŏtki, bōmbōniyra, jakisik gryfny albōm ze malōnkōma... co jŏ wōm byda panoczku tuplikowŏł, prŏwda? Sōmeście panoczku kultōralny czowiek i poradzicie to jakosik sporzōńdzić...
Na to Jorgusiowy łojciec:
– Ja, ja, panoczku dyrechtorze, jŏ miarkuja jak to jes... Rōłzczasu szlichmy ze mojim szwagrym bez pole. Uwidziŏłech ciga na polu, chyciōłech ci jōm za rogi, nasadziōłech i... dupcza łod zadku. I jak ci mi łorŏz tyn mōj gizd, tyn mały skurwysyn niy prasknie ze takigo miecha po cymyncie... Panie! Mie ino rogi we gracach łostali!!!

środa, 8 lipca 2015

Jeżech gejym...

Jedyn dupny szef fyrmy zebrŏł do kupy swojich pracōwnikōw i napocznōł ryjda:
– Mōm, ludzie, dlŏ wŏs pierōnym niyherskŏ, złŏ wiadōmość. Skuli szporowaniŏ musza kogoś swŏs wyciepnōńć ze roboty.
– Mie niy! Mie niy, boch jes myńszōściōm i moga wŏs szefie winować ło rasizmus! – wartko rzōńdzi jedyn czŏrny arbajter.
– Joch jes baba i zarŏzki wniysa do gyrichtu, do sōndu sprawa ło zeksistōwske traktowani. – łostrzygŏ zekretarka.
– Nō, chopie, sprōbuj mie wyciepnōńć ze roboty, to cie pozwia do gyrichtu i byda cie winowŏł ło dyskrynimacyjŏ skuli wiyku! – wyciedziōł jedyn kyrownik, ftorymu pizłŏ już bez siedymdziesiōnt lŏt.
Wtynczŏs wszyjske kuknyli na takigo jednego bezbrōnnygo, modego, biŏłego i blank zdrowego karlusa. Tyn tak deczko pomedikowŏł i wyszeptłŏł:
– Cosik mi sie zdŏ, iżech jes cheba... gejym...

wtorek, 7 lipca 2015

Lichy szoferŏk...

Deczko zwiykowany ale wizgyrny i pakerny chop siedziŏł we sztrasnrandowym szynku i jŏd se łobiŏd. Do tyj knajpy wlazło trzech, ździebko chycōnych, moc wydziyrganych motorcyklŏrzy... skōrzanne jakle, rozkociymbane wosy... mordy jakesik zagiździŏłe... jednym słōwym Hells Angels... zarŏzki bōło widać, iże sznupiōm za napasztniyńciym... Piyrszy śnich, jak przelazŏwŏł kole starzika kepnōł cygara we jejigo apfelsztrudlu... drugi charknōł mu do kafyju... a trzeci ściepnŏł talyrz łod tego grajzika na ziym...
Tyn istny blank nic niy rzyknōł na to, niy skwitowŏł tego, ino polekuśku podlŏz ku szynkiyrce... wartko zapłaciōł za łobiŏd i jednako gibko śmietnōł ze tego szynku...
Te harleyowce łozsiedli sie i łobsztalowali po ladze biyru. Po jakimsik łoka mrziku szynkiyrka przismyczōła łōnym zajdle piwa i postawiōła na tiszu. Wtynczŏs jedyn śnich zagŏdŏł:
– Hej ty! Dziołcha... widziałaś tego frajera? Straciōł ci sie we łoka mrziku... ciota śniego a niy chop!
Na to ta szwarnŏ szynkiyrka:
– Nō, i szoferŏk śniego tyż niy nŏjlepszyjszy... lichucny... moc lichucny...
– A to czamu? – spytŏł drugi.
– Widziałach przed kwilkōm bez łokno jak tym swojim trackym łozjechŏł wasze trzi motorcykle!

poniedziałek, 6 lipca 2015

Jedna jakla, drugŏ...

Baba jednego istnego dupczy sie ze swojim apsztyfikantym, kej łorŏz wrŏcŏ sie jeji chop do chałpy.
– Jezderkusie! Wlazuj do szranku i skukej sie tam! – rzōńdzi ku tymu kōchankowi.
Chop wlazuje do jejich szlafcimra i pytŏ ze złōściōm:
– Czamu jeżeś babo blank sagŏ?
– Anŏ... bo niy mōm sie w co łoblyc, tak maluśko zachōw, prziodziynia mi kupujesz! – wajŏ ta babeczka.
– Eee, jak zawdy bajrujesz i wyłōlbrzimiŏsz! – rzōńdzi chop i łotwiyrŏ jejich szrank we izbie.
– Kuknij... jedna jakla, drugŏ jakla, trzeciŏ jakla... łōsmŏ jakla, serwus Jōłzel, dziewiōntŏ jakla...

piątek, 3 lipca 2015

Geltag...

Rōłzczasu na policyjŏ glingŏ łozgzukanŏ baba:
– Policjyjŏ? Kciałach wartko zgłōsić, iże mōj chop sie kajś zapodziŏł... zaginōł, na amyn sie straciōł!
– A rzyknōm mi łōni łod kedy go już niy ma dōma?
– Anō, bydzie już ze dwa tydnie jak sie zapodziŏł!
– Nō, tōż dziepiyro dzisiŏj to zgłŏszŏcie?
– Nōōō... ja... przecamć, kurwa, jutrŏ łōn mŏ geltag, mŏ wypłata!

czwartek, 2 lipca 2015

Nasze babeczki...

Rŏłzczasu jedne małżyństwo, kere już przetrŏwiōło ze sia jakesik dwadzieścia lŏt i napoczło sie łōnym już stopierōńsko ze sia mierznōńć uzdało, iże potrza cosik we jejich życiu zwekslować. Przeczytali już wszyjsko Wisłockij i Lwa Starowicza i na łostatku postanōwiyli łoprzić sie jednōstajnōści jejich spōłżyciŏ zeksualnygo i zaprosiyli ku sia na noc inkszŏ pŏra małżyńskŏ. Nŏjprzodzij puściyli sie pŏra fylmōw porno, zatym... nō, i tak dalszij...
Na drugi dziyń ło rozwidnioku chopy spichli sie przi rychtowaniu śniŏdaniŏ, przi robiyniu smażōnki na szince. Gospodŏrz zwiyrzŏ sie kamratowi:
– Wiysz chopie! Joch na isto jes uradōwany jak hazok we szałocie. Rod’ech, iże prziszli my na te idy! Już łod wieluch, wieluch lŏt niy bōło mi tak dobrze....
– Wiysz! Jŏ tyż jeżech łocałbrowany! Medikuja ino, eźli nasze baby tyż sie... przipadli do gustu?