Czamu słepiōm ?

Moja staro ciyngiym mi dziura w basisku borowała, po jakiymu chopy durch słepiōm ta gorzôła. Kejsik żech niy szczimoł. Kôzôłech ji sie zicnōnć na zesliku, zawrzić japa i dać pozōr. Nō i zacōnech ji to gynał tuplikować choby nasz kapelōnek we tym miesiōncu ze szperōm na gorzoła, Wiycie, we siyrpniu. Bo to je baji tak: Sōm roztomajte zorty łożyrokōw i możno jich wszyjskich niy byda poradziōł zrachować – bo mie tyż już ta sklerōłza łapła – nō ale byda to, podwiyl jeżech jece trzyźby, pomaluśku skłôdać. Gorole pijōm skuli upadōwy. Przeca wszyjsko u nich je na szago i bali na jakisik berdze idzie ukiołzdnōńć, łobalić sie abo i szłapa połōmać. To ci już lepszij cosik przodzij szluknōńć dlô wôgi. Kaszuby duldajōm juzaś beztōż, iże wszandy majōm wilgło. Łod morza jejim ciōngnie, to i we chyrtōniu tyż ci ta wilgłość trza chycić – nō, to Kaszub musi luchnōńć chocia jedna laga kôżdydziyń. Kurpie chlapiōm ino ze strachu. Suchejcie! Naobkoło lasy, kniyje, roztomajte bezkurcyje po nich tyrajōm, to dlô łopowogi trza musowo deczko wytintać. Ruskie tutajōm ino zgwoli zimna. Mojigo starego, kej ruskie wziynli ci go łod nôs we śtyrdziestym piōntym, to dziepiyro tak richtik sie łogrzoł kajsik kole śtyrdziystego łōsmego .. pierōnie, przikludziōł sie nazôd do dōm taki nagrzōny, że .. dejcie pozōr! Pepiki, znacy Czechy muszōm wyżrić skiż tego, iże majōm takich sōmsiôdōw jak my. Chocia bez łostatnie lata (terôzki już możno niy, skuli tyj côłkij Uniji Ojropyjskij) to chnet côłko jejich gorzôła wandrowała na puklach tych, co to jich mrowcōma mianujōm, zōłwizōł do Polski (i tak ci już bez kielanoście lôt). Miymce to sie sztyjc nabzdryngolōm bo ... nō, jak by Wōm to wyeklerowć ? Widzieliście kejsik Niymca, wiycie jak taki pierōn wyglōndô ? Nō, tōż taki Niymiec ło szaroku sie łocuci, wlejzie do haźlika, wejzdrzi sie we zdrzadło i kej łoboczy w niym takigo szwoba to ... zarôzki ze cyjntla abo halba musi hornōńć. Ynglyndery tintajōm zgwoli tego ciōngłygo ćmoka – jak sie szluknōm, to tak, choby sie jim fakla zapolōła pod deklym. Japanery to ci słepiōm z neca abo cosik wele tego, jakesik ci tam zaki (?), sake (?) abo ... inksze diosectwo. Indianery to ci tak po prôwdzie niy miarkuja po jakiymu łōni muszōm na isto bzdryngolić, ale bezmać beztōż, coby jim niy zbladła ta szarłatniô fresa. Chińcyki szlōndrajōm gorzôła, coby zapić te roztomajte robole, glizdy i take tam inksze łoszklistwo, ftore łōni ćkajōm, a kere bez gorzôły niy przecisnōm sie bez chyrtōń. Poznaniôki słepiōm tyż richtik fest, ale ino ... kej jim ino fto laga postawi. Szwiece, te łod kopydła i drajfusa chlejōm, bo niy poradzōm sie doczkać pyndziałku. A we pyndziałek, to łōni majōm te słepanie naszkryflane we „konsztytucyji”, pra? Kawalery zasik to tintajōm skuli samotności. Mamulki zawdy jim gôdali, coby przed śnikiym trzimali grace na pierzinie, nō tōż co majōm robić ? Muszōm sie chocia jednego ciornōńć dlô spokojności. Wojôki juzaś beztōż niy poradzōm szczimać bez gôrzoły abo jabola, iże jim sie durch i jednym ciyngiym ckni. Przeca sami wiycie, iże we kasarni jedzine co terôzki za tego ministra Klicha jece szczylô to ... frōpy łod flaszek. Te co durch pōntujōm (nō, te pōntniki łod łojca Radiopiernika), ftore ci sztyjc śpiywajōm na côłki karpyntel choby jich fto ze skōry łobziyrôł: „Jak dobrze nōm zdobywać gōry ...”, kej deptajom na Jasno Gōra po mobilnioki ze Radia Maryja, to tutajōm, bo ... bo, tak po prôwdzie niy wiym czamu, ale sōmech widziôł latoś we siyrpniu pierōnym dupny niyszczysny fal kole Czynstochowy. Bōło ci to jużcić na zicher „czołowe” szczaśniyńcie sie dwiuch pielgrzimek, ze cego jedna bōła – jak to sie terôzki gryfnie gôdô – „uprziwilejowano”, bo bōł to pōńć ... policajtōw do kupy ze utrzidupskimi tych cwilingrōw. Żyniate, te to ci na zicher miarkujōm zgwōli cego muszōm, padōm, muszōm cosik wyżrić ... te, synek, ty sie niy lachej. Kej ty sie tyż łożynisz, to chnet na isto spomiarkujez czamu chopy durch słepiōm. Skuli łobamōncyniô. Bo dejcie sie ino pozōr. Przijńdzie taki na tyn przikłôd samotny, ferniok do chałpy, depce do kilszranku, tam nic niy ma, to tōmpie niyskorzij do prykola. A tyn żyniaty? Przilazuje taki istny do chałupy, gawcy do prykola ... i tam nic gryfnego niy ma to ... idzie zarôzki do kilszranku, biere halbka i .... już !!! Nō, tak sie gōwkuja, iże moja Haźbiytka tyż to spokopiōła i do mi już terōzki pokōj, i niy bydzie mie szterować kej przińda ździebko dzisiôj ścioprany. Pra ? Ojgyn z Pnioków