Nō, tōż mōmy już niy ino ta łoszkliwŏ „viagra” w Chorzowie. We telewizyji idzie ujzdrzić jak ci to śtyry, piyńć, możno niy tak blank gryfnych ale fajniście łopolōnych ojli i rzituli asi sie, łozprawiŏ co tyż to łōne poradzōm ze chopym zmaścić we jejich prykolach. Jedna musowo trzi razy za rajōm, inkszŏ durch i jednym ciyngiym bez trzi godziny, nastympnŏ na zicher kŏżdydziyń i bez cŏłki rok a jesce inkszŏ kŏżdōm razōm we inkszym sztelōngu ale... łōne wszyjske nŏjprzodzij muszōm tego swojigo chopa cielepy nafutrować choby kormika... pilami, coby mu tyn jego „interes” sztyjc wyrcŏł. Przecamć my to już mieli pŏrã lŏt tymu nazŏd, kej napoczli sam u nŏs caubrować ze tōm wywołanōm viagrōm. Ale, ludzie, trza dŏwać pierōnym pozōr! Bo i wtynczŏs, i terŏzki mogōm sie prziterfić roztomajte cufale. Choby i taki. Ida ci kejsik po słodach do chałpy a sam łorŏz wkarowŏł wy mie sōmsiŏdōw synek, maluśki Ecik. Tak mu sie jakosik ta fresa śmiŏła, iżech sie musiŏł spytać go co mu tak szpasobliwie.
– Wiycie panie Ojgyn – pado mi tyn miglanc – starzik dali mi tysiōnc złotych. Cŏłke tysiōnc złociokōw.
– Tysiōnc złotkōw? A za cōż to? Cożeś to takigo mu zbajstlowoł juzaś?
– Ano, zeszły tydziyń wołŏ mie do antryja starzik i po cichu kŏże mi pyndalować do japtyki kupić pŏrã pilōw tyj „viagry”. Jak to bydzie take dobre jak gŏdajōm te hamerikōny, to dom ci synek sto złotych ze mojij pynzyji. Dzisiŏj widza, iże idzie do starzika briftryjger, toch do niego zarozicki polŏz. Patrza a starzik wciskajōm mi do kabzy tysiōnc złotych. Już żech myślŏł, iże starzikowi ta sklerołza piere na dekel ale łōn mi do ucha gŏdo:
– Sto złotych, synek, jes łody mie a dziewiyńć setek to starka dociepli!
Widać dobro je ta „wiagra” , nō i tyn nowy medikamynt tyż, chocia majōm te pile i take ubōczne dziŏłani. Terŏzki sie miarkuja, iże tak na podzim łońskigo roku uniyskorzōł sie pogrzyb starego Myrcika ło cŏłki tydziyń (pizło mu tydziyń skorzij łoziymdziesiōnt piyńć lŏt), bo bez śtyry dni niy poradziyli familijanty truchły zawrzić bez ta „viagra”, co jōm Myrcik zjŏd podwiyl niy kipnōł.
Bōł ci jesce jedyn fal, kej na skryncie drōgi ze Chorzowa do Piekŏr łobalōła sie kipa, ftoro wiōzła ladōng tyj modernyj viagry. Łod tego czasu drōga ci sie blank samtukej... wyprościōła!!!
Brak komentarzy:
Prześlij komentarz
ojgyn@interia.pl