Rółzczasu pôra Hamerikónów we strzydnim wiyku ze północnyj tajli USA zacnióła we pojstrzodku srogachnyj zimy do gorkich dnioszków i uzdali łóni, co wykludzóm sie na dół Hameryki, na Florida, kaj przetrôwiyli 20 lôt tymu nazôd swoja pożyniaczkowô rajza. Chop miôł deczko dugszy urlaub i pojechôł ło jedyn dziyń skorzij.
Po meldónku we hotylu spomiarkowôł, iże we izbie jes kómputer i uzdôł, iże pośle swojij babie ymilka. Nó ja, szajsnół sie ale ło jedna literka we adresie. Ymilek znôd sie tóż tyż tym knifym we Houston u gdowy po jednym pastorze, kierô dziepiyro co wróciyła razinku do dóm ze pogrzybu swojigo chopa i kciała wartko sprôwdzić eźli we krzince pocztowyj sóm jakiesik kóndólyncyje łod familiji i przocieli.
Jeji synek, deczko niyskorzij znôd ci jóm zymglóno przed kómputrym a na ykranie przeczytôł:
Do: Moja umiyłowanô babeczka!
Tyma: Jeżech już na miyjscu...
Wiym, miarkuja na isto, iże jeżeś zadziwanô wiadómościóm łodymie. Terôzki majóm tu kómputry i idzie posywać ymilki dlô nôjbliższyjszych. Razinku żech sie zameldowôł. Wszyjsko jes narychtowane na twoji przikludzynie sie jutro. Już ci sie festelnie raduja na tref ze cia. Móm nôdziyja, iże twoja rajza bydzie tak samo bezproblymówô, jak moja.
PS: Samtukej na dole jest richtik festelnie gorko!
Brak komentarzy:
Prześlij komentarz
ojgyn@interia.pl