Wiycie, kiejsik, jesce za mojich modych lôt, wybralichmy sie ze kamratami bez lato do Miyndzybrodziô. Lato, klara grzeje choby halbecka starzikowego bimbru, naobkoło mocka modych ludzi, szwarne dziołchy, słepanie, roztomajte impryzy ... Nó ale, jadymy wartko. Trzeciô już noc za rajóm, słepiymy już możno szczwôrtô halbecka we trzech aże sam łorôz przikludzióło sie ku nóm dwiuch karlusów ze Poznaniô. Nó, i rzyknijcie mi jak sam niy napytać ku sia sómsiôdów ze celtów wele, i ku tymu Poznaniôków. Łobalyli my kolyjnô szykownistô trziśćwierciówka (takô wiycie 0,7) i na tym nóm sie gorzôłecka prziwiyzióno ze Chorzowa skónczóła, miyli my już gorzôła zbyte.
Napoczli my sie deczko tropić, co tyż dalszij dziôłać ze takóm na isto gryfniście napoczniyntóm łodwieczerzóm, kiej cowiekowi sie zdo, iże mógby jesce niy jedna halbecka zdziyrżić a niyskorzij zabrać sie za ... babeczki. Na to jedyn ze tych prziflostrowanych ku nóm Poznanioków pedziôł:
– Nó, chopy, to jô pójńda po gorzôła!
Wartko zrobiyli my ściepa i karlus podeptôł. Czekalichmy, czekali. Zatym poszli my na inkszô impryza ze naszymi chorzowskimi kamratami, pobawiylichmy sie i ... poszli yntlich nynać do celtów. A przipytanego kamrata Poznaniôka ani widu, ani słychu.
Blank ło szaroku, tak kole ... dwanôstyj wylazuja ze tego mojigo celtu, procnie medikuja co tam driny... za baba nynô. Wylazuja, sztrekuja sie a sam ci kole mojigo celtu siedzi tyn sómsiôd Poznaniôk, ftory wczorej na łodwieczerz poszôł po ta gorzôła. Siedzi taki festelnie utropióny we samiuśkich batkach i tunkach, i podpiyrô palica łobiyma gracami ...
– E! Ty! Co tam łochyntolu? – spytôłech łopaternie i niy za gośno, bo i mie we palicy żgrzmiało ...
– Chopie ... wylandowôłech na wytrzyźbiółce we ...Żywcu.
– Po jakiymu? Co sie stało?
– Tak po prôwdzie to niy za tela pamiyntóm ale z tego, co mi policajty łozprawiali, to króm tego iżech słepôł gorzôła i popijôł jabolym do kupy ze chacharami, dresiôrzami, kciôłech jesce ze Żaru wyfurgnóńć zyjgelflugcojgiym (szybowcym), pływôłech we jeziórze, kaj mie yntlich policyjô ze waleskóm łapła i przikludzióła mie na ta wytrzyźbiołka, pozbôwiajónc mie pijyndzy na gorzôła, ftoroch miôł kupić ... to tak na isto ... to sie chopie nic niy stanóło ...
Trefiali my sie jesce śniym do kupy pôrã razy ale ... nigdy go już po gorzôła my go niy posywali!
Brak komentarzy:
Prześlij komentarz
ojgyn@interia.pl