Zachorzała nóm naszô Starka. Jako, iże kobiycina staryńkô, prziguchawô i deczko już ślypawô, tóż tyż roztomajcie to bywô – uzdołech se dó nij zazwónić.
– Serwus moja roztomiyło starecko!
– Iże cooo?
– Witóm Ółma, Ojgyn gôdô.
– A witej synek!
– Słyszôłech, iże sómeście starko niymocnô.
– Ło, jaaa ... gripa jakosik żech chyciyła.
– A te antybijotyki bierecie Ółma?
– Iże coooo ?
– Antybijotyki bierecie jakeś?
– Blank niy słysza, co ty ku mie gôdôsz ...
– AN-TY-BIJO-TY-KI BIERECIE JAKEŚŚŚŚŚŚŚŚ ... Ółma?
– Noo ... blank niy rozumia co ty Ojgyn gôdôsz ...
Ze srogij izby łodzywo sie moja Elza:
– Spytej sie jóm, eźli biere jakiesi medikamynty, bo moge łóna przeca niy miarkować, co to sóm antybijotyki ...
– ÓŁMA, A MEDIKAMYNTY JAKEŚ BIERECIE?
– Aaa, medikamynty, mój ty Ojgynku, ...biera jakiesik ci tam ... antybijotyki ...
Brak komentarzy:
Prześlij komentarz
ojgyn@interia.pl