Dôwno, dôwno tymu nazôd byli se Lech (ze cwilingrym Jarosławym) Czech i Rus. Byli ci łóne festelnie skamracóne podwiyl cwilinger Lecha – Jarosław niy napocznół sie ze wszyjskimi naobkoło wadzić jak sto diosków. Powadziyli sie tyż wrółz Jarosław i Lech ze wszyjskimi, i niyskorzij dwa braciki, ftore po dródze jesce zahabiyli frech Miesiónczek, przikwanckali sie samtukej na nasze łodwiyczne ziymie polske. Nó, i terôzki napoczło sie:
Kajsik kole 966 roku Lech i Jarosław łokrzciyli Polska. Teraźni cajtóng „Gazyta Prôwdziwie Polskô” wyfaflała, iże braciki ze Żoliborza już ci bezmać łod trzech tysiyncy lôt wyznôwajóm krześcijaństwo. Łoszkliwe wyznôwce Dónalda Tuska juzaś ci same zeżarli świyntygo Wojciycha. Lech i Jarosław festelnie głódujóm, bo kamrat Tuska zajimôł jejich stołki przi tiszu. Lech zatym zabulół goldym za ciało tego zeżartego.
Prziszôł ku nóm 1410 rok. Lech i Jarosław nahuśtali poduk lôt Krziżakóm pod Grunwaldym. Lech sóm sztartnół jesce na Malbork. Jagiyłło posuchôł inkszych dóradców, ftorzi mieli ... blank inksze instrukcyje. Idónc na łodsiycz bracikowi-cwilingrowi, Jarosław prziszôł durch bez ciaplyta i maras Zahary. Pociotki juzaś tego Geremka sujóm mu piôsek we kółka. Riter Cymański ze Malborka ślazuje do podziymiô wrółz ze łobóma giyrmkóma.
1683 rok – srogi trijómf Lecha pod Wiydniym. Na sóm widok hufców PiS-u, islamisty śmiatajóm choby jim fto soli nasuł na podłogónie. Tusk kamraci sie ze zultanym. Jarosław wachuje we taborach.
Łostatek XVII wiyku – kónfederacyjô PiS-owskô próbuje szterować rozbioróm, kiej Komorowske łoddôwajóm sie uciychóm ze Litwinkóma. Lech i Jarosław lygajóm „reytanym”, coby przebródzić srogij gańbie (Matejko ino skuli tego, co mu niy nastykło ajnlasfarby namalowôł ino jednego śnich). Lech na szpicy tyj côłkij „insurekcyji” przisióngô na krakowskim rynku. Jarosław zaszpóntowôł swojóm myckóm srogachnô kanóna.
Przełóm XIX i XX wiyku – Lech i Jarosław wypokopiyli petrolyjlampa i łoba wrółz łodkrywajóm rad i polon. We frajnym czasie pod psyudónimym piszóm do kupy „Pana Tadeusza”, „Etiuda rewolucyjnô”, „Quo vadis” i „Chłopów”.
We 1920 roku – Lech dorôdzô Piłsudskimu zbajstlowanie cudu nad Wisłóm. Jarosław retuje côłki świat łod kómunizmusu, dôwajónc tymu świadyctwo.
We 1939r juzaś – tajny pakt Sikorski-Pawlak. Tusk łostrzyliwuje Westerplatte. Lech i Jarosław brónióm sie blank do łostatka.
Mómy 1944 rok kiej to po łozszyfrówaniu „enigmy” Lech i Jarosław do kupy ze swojóm Mamulkóm wygrywajóm Powstanie Warszawske. Hitler na klynczkach. Kónszachty starzika ze Wermachtu i łojców ze KPP na łoka mrzik drzynżdży (niweczy) jejich trijómf.
1980 rok – Lecha sztrejkujóncygo we Stoczni nawiydzajóm tysiónce Polôków, na szpicy ze Przenôjświyntszóm Paniynkóm. Heryka Krziwonos szydliwie i na isto złóśliwie zahaltowała sztrasynbanki, coby Jarosław niy móg podciepnóńć bracikowi-cwilingrowi klapsznitów ze tustym.
Nó, i jes 1989 rok – Lech i Jarosław łobalyli kómunizmus. Stôwajóm sie łoba idólami, bóstwóma Polôków. Wygrywajóm śtyrnôście welónków za rajóm i ku tymu jesce wojna we Iraku i Afganistanie.
Nó, i terôzki cheba nôjważniyjszy byfyjl, wiadómość. Autor tego artikla niy spómniôł sam blank nic ło łostatnich łodkryciach IPN-owskich archeologów, ftorzi udowódniajóm , iże to niy Romulus i Remus byli wykôrmióne bez ta wilczyca (przi przileżitości bezmać niyślubnô – stela te wszyjske próblymy ze łozpowszychnianiym tyj wiadómości – cera Szarika i Lassie), ale razinku Lech i jego bracik Jarosław, kierzi byli zatym sprawcami tego wywołanego wiycznego Miasta, ftore mianowano skorzij Jarosławicami, a côłki tyn półwysep Apeniński mianowali za starego piyrwyj Lechistanym, a jego miyszkańców Lechitami.
Nó ale, co jam jesce zglyndym tych dwióch IPN i ta czôrnô polskô burżuazjô kościylnô ze Dziwiszym i Leszkym Flaszkóm Głódziym wysznupie i podô do wiadómości, tego podwiyl co, żôdyn niy poradzi sie forsztelować.
* na podstawie tekstu Jacka Żakowskiego znalezionego i internecie ...
Brak komentarzy:
Prześlij komentarz
ojgyn@interia.pl