Zimowy śnik ...

Wiycie! Bez łostatnie dwa-trzi lata chnet blank ci sam u nôs zimy niy bóło. I ludzie wajali, iże dziecka przepómnóm jak tyż co to śniy wyglóndô. Latoś jes i zima, i śniyg i ... juzaś pieróńskô łostuda. Zasuło ci we piyrszyj połowinie stycznia chnet w côłkij Polsce bany, sztreki, drógi, lód połómôł asty, ftore juzaś posrywali druty i we wieluch miyjscach niy bóło sztrómu. Możno to i skuli tego krajzowoł taki jedyn wic:
Jaki jes nôjmyńszy zwiyrzôk, nôjmyńszô gadzina we Polsce?
Anó, to ci jes „drógowiec” ... wszyjske nasze ceściorze! Ledwa ino pôra cyntimyjtrów śniyga śleci a jich już blank łod tretuaru niy idzie ujzdrzić.
Nó, dobra, ale jô i ło tym tyż niy kciôł dzisiôj berać, niy ło wicach. Przeca jes jesce zima côłkim pyskiym chocia kajniykaj jes ci już festelno toplaka i maras. Tela, co tak po prôwdzie to ino nôjsrogszô uciecha mieli nasze dziecka, ftore już ze zimowyj laby przikludziyli sie nazôd do szuli. A juzaś take stare knakry jak jô, muszóm kukać coby niy zaboczyć spodnioków, coby starô poflikowała razym wszyjskie fuzekle, i coby niy zaboczyć srogij sznuptychli, kiej napocznie ze kichola ciyc. I rzyknijcie mi tak po prôwdzie, bez cygaństwa, bez kminiyniô, te wszyjskie, kierym już pizło bez szejśćdziesiónt lôt, eźli niy kcieli byście – nikiej niyftoro gadzina – napocznóńć na podzim bez pôra miesiyncy zimy nynać?
Niy wierza! Jô sóm – kiej ino moja Elza pyndaluje do roboty ło pół siódmyj ło szaroku – to bych sie tak nôjlepszij zakulôł, zababulół we pierzina i nynôł, nynôł .... jesce bez dwa- trzi miesiónce. I to niy skuli tego, co jes zima na dworze i jako piździawica, niy! Ino coby ze tego prykola niy wylazować.
Ludzie! Przeca bali i do szynku trza sie łoblyc we cwiter, jakla, watówa, szczewiki ... a niyskorzij, kiej cowiek już cosik szluknie, to chnet napoczynô sie szwicować, napoczynô sie mokrzić pod myckóm, i to ... blank ci niy skuli tyj ustawy „ło wychowaniu we trzyźbości”.
A Wiycie, sóm na świycie zwierzôki, jes ci takô gadzina, ftorô poradzi ci i nôjsrogszô zima przetrzimać, chocia to jes maluśkie i niy mô takigo filipa jak cowiek. Kajsik żech wyczytoł (terôzki idzie mocka wyczytać i we „internecu”), iże jes ci taki zwierzôk, kierego amerikóńskie Indianery mianujóm „sleepyhead” znacy „śpioch” i wôży ino kajsik kole 50 gramów, a poradzi nynać ciyngiym bez śtyry tydnie. Nynô we kaktusie (możno skuli tego je mu wszyjsko jedno?) i mô ino przi śniku piyńć gradusów a bez rest roka wiyncyj niźli śtyrdziyści..
Jes i inkszy – i to bych musiôł pedziej kiej indzij – ptôszek, kiery sie mianuje „lelek”. To niy jes polski ptôk (ale sam tyż take żyjóm) i łón nynô dugszij niźli te, co my miarkujymy, iże nynajóm festelnie bez zima. Tyn „lelek” nynô dugszij niźli popielica, niźli świstak, lebo niźli ber. A niy gôdóm sam już ło takim ptôku (coby mie te nasze biologi za słówecka niy chytali) „lelek kozodój” (cigów niy cyckô, chocia tak niyftorzi gôdajóm). I, jakech to wyczytôł, to niy ino zima, ale kiej niy ma co wećkać do brzucha, to niyftorô gadzina, idzie na isto, na dugo nynać. Wiela by sam szło ło tym godać (ale, fto to kce wiedzieć? ) Rzykna ino tela, co jes ci takô wywiórka (niy naszô, niy naszô), kiero swinie sie we taki knółtel, wlazuje do dziury we ziymi i nynô, jak przinoleżi. Ziymia moge mieć i dwadzieścia gradusów mroza, a ta gadzinka mô bali (minus dwa gradusy) – szkryflóm minus, coby żôdyn niy pedziôł, iżech sie chybnół – i niy zamarznie jeji krew. Styknie ale, coby jóm ftosik wtynczôs tyknół i ... zarôzki zemrzi!
Nalech sam terôzki nafandzolół, pra? Tela, co mie już blank ta zima dopolóła, znerwowała i tyż kciôłbych, coby sie jakosik gryfnô pogoda zrobióła. Nó ale, nôs tak by tak jesce czeko toplaka i tela mómy dobrze, co nóm sam u nôs we Chorzowie żôdnô rzyka niy wyleje, bo przeca niy werci sie gôdać ło Rawie, ftorô już kielanôście lôt nasze chorzowske rajce kcóm przikryć ... terôzki ale ... za nasze pijóndze.
Ale, ale to jesce niy ma wszyjsko. Terôzki gôdôłech ło tyj gadzinie, kierô kce zima przetrzimać, a we świcie sóm zwierzôki, kiere kcóm ... lato strzimać, coby niy kipli. Ale to ci już jes blank inkszô bôjka. I ludzie! Rzyknijcie mi, fto by niy kciôł sie swinóńć we taki maluśki knółtel, coby niy przenynać ta côłko zima a i ZUS by niy musiôł pynzyji posywać? Nó ale, ludzie tego niy poradzóm i ... tela!