Jedyn żyniol skapnół sie, prziszôł na to, iże jego babeczka ciyngiym go ze inkszymi chopami zdrôdzô. Rôz tyż tak jakosik na łodwieczerz doczkôł, aże łóna sie szykownie łodziôła i wylazła ze chałpy. Zarôzki łón tyż wyfuknół z dóma, wlôz do taksy i kôzôł tymu taksiôrzowi jechać wartko za ałtokiym we kierym bóła jego starô. Niy zetwało kieladziesiónt minutek i pokôzało sie, co ta jego babeczka robi we takij „agyncji towarziskij”, znacy we takim modernym burdelu. Mało ci go szlak niy trefiół, dych ci mu sztopło, tak ci sie festelnie znerwowôł. I dziepiyro po kwilce gôdô do tego taksiôrza:
– Kcesz chopie przidubnóńć jakosik stówa?
– A czamu by niy? – łodmawiô na to szoferôk. – Ino mi rzyknijcie, co jô móm zrobić, coby ta stówa erbnóńć ?
– Wlejziesz chopie do tyj agyncji, zebieresz ze sia ta moja szantrapa, ta moja baba, wstyrczysz jóm tu, do tego twojigo ałta i zakludzisz nôs łobiuch do kupy do chałpy.
No, i taksiôrz wlôz rajn do tyj agyncji, tak jak sie ugôdali. Za jakiesik pôrã minutków dźwiyrze sie ze srogim gruchym roztwiyrajóm i wypôlół śnich tyn taksiôrz, kiery dziyrżôł za kudły baba, ftorô sie stopieróńsko szprajcowała, bańtowała. Łodewrził do krzóna dźwiyrka ze tego jejigo ałtoka, wciep ta baba rajn i wrzesknół :
– Trzimejcie jóm panoczku, fest jóm trzimejcie !
Tyn chop tak kukô, gawcy na ta baba i łorozki zawrzesknół ku tymu taksiôrzowi:
– Aleć przeca to niy jes moja starô, to niy jes moja baba!!!
– Wiym, wiym kura, to jes moja! Terôzki dziepiyro ida rajn po waszô!!!
Brak komentarzy:
Prześlij komentarz
ojgyn@interia.pl