We tych czasach kiej mielichmy jeszcze miliocyjô, rółzczasu jedyn milicjant przismyczół do dóm taki moderny wtynczôs „wykrywacz kłamst”, ftory na kôżde wypedziane cygaństwo ryagowôł dźwiynkiym „piiip”.
Łoroz wkarowôł do chałpy jejigo synek i wrzescy:
– Dostôłech pióntka ze matymatyki!
Na to ta maszina:
– Piiip!
– Czamu cyganisz stopieróński łochyntolu? – wrzeskła festelnie snerwowanô mamulka. – Jôch na isto dostôwałach we szuli same ino pióntki...
– Piiip!
– Nó, niych bydzie... szczwórki...
– Piiip!
– Nó, dobra... trójki...
– Piiip!
– Nó, cicho już, przinosiółach chnet samiuśke cwajki. – łodrzykła łoklapniónô już tym pipaniym mamulka.
Na to wszyjsko wyrwôł sie łojciec-milicjant:
– A kiej jô chodziół do szkoły...
– Piiip! Piiip! Piiip!
Brak komentarzy:
Prześlij komentarz
ojgyn@interia.pl