Nó tóż mómy i trzecie tysionclycie, i dwadziesty piyrszy wiyk, i... kaca – takech kiejsik napocznôł moji bôjcynie. I to nôjgorzij jes ze tym łostatniym. Chocia... niy côłkiym, niy tak blank. Bo jak naszkryflôł mi bez internec taki jedyn kamrat ze Świyntochlowic:
„Fto niy mioł kaca, niy wiy co to jankor,
Kiej kufa drzewnianno, a na ślypiach charboł.
Kiej koty tompióm raciami ło blachy,
A dziamble w szlagcojg walóm i dziurawióm dachy.
Suchość we cowieku łod gymby do duszy,
I bolóm cie pazury, i kudły, i uszy.
Niy pogymzisz, niy legniesz ... a nôjgorzij siedzieć,
Co kwilka ci sie chepnie przedwczorejszym śledziym.
Możno sóm i takie co kaca niy mieli ...
Nale, cóż łóni w życiu culi, coż łóni widzieli ?”
Nasz downiyjszy wikary ze „Jozefki” to by ci pewnikiym pedziôł, iże na kaca to nôjlepszij... blank niy słepać gorzôły. Nale, widziôł fto chopa ze Pnioków, kiery by niy miôł rôd gorzołecki? Jô niy znóm żôdnego takigo. Cheba, iże Bercik łod Majzlinyj, kiery już niy mô leberek a nyrki smycy we bojtlu plastikowym kole rzici. Ino co to śniego za chop? To stare galoty a niy chop, prôwda?
We wszyskich cajtongach ciyngiym bez cołki rok szkryflajôm, co możno robić coby niy mieć – jak śpiywôł Gołas – „tupotu białych mew”?
Dać potrza tymu swojimu „łorganizmowi” – jak kiejsik szkryflôł „Dziennik Zachodni” – to, co tyż zebrôł tyn ankohol. Mie to tam nic niy zebrôł a dôł dobro lałna, bółech wizgyrny i miôłech łod aże sto pierónów uciechy. I tu żech jes śnimi zgodliwy – niy pić mlyka (przeca nôs, chopów już dôwno łod cycka łodstawiyli). Cheba, iże ftoś wypokopi, iże mô to być richtik maślónka abo jesce lepszij kiszka. Możnô to i jesce harynek abo dobre piwo z jajcym. Na łostatek ómszlak z modych cycków, nale ino łod dziołchów kiere ci majóm nôjwyżyj ino dwadziyścia lôt i ... do tego jesce blank modo wyglóndajom. To wszysko inksze, to sóm berdyje i jakiesik medikamynty łod goroli; Ślónzôk, nasz chop to wiy. Na kaca jes ino klin. Przeca nic tak niy lycy, ani Apap, ani Aszpiryna, ani Alka Prim i ani te inksze moderne pile, ino dobry, zimny sznaps i szopa piwa. Tu możno bydzie i łostuda. Niyftore to niyskorzij majóm kaca „szpiralnygo”. Niy wiycie co to jes? To jes tak: eźli Wy môcie kaca chopy, a tyn wasz kac mô tyż jesce kaca i niyskorzij tyn kac, tego waszygo kaca, tyż ci mô kaca, to to ci jes na isto kac „szpiralny”.
A jô Wóm musza pedzieć, iże po gyburstaku mojij Elzy (i możno tyż byda miôł jutro po mojim), to jô już móm zawdy aże trzi „szpirale”. Dalszij to już bez szpasu aże wytrzyźbiyja.
\ /
OdpowiedzUsuń|
---