Rano, ćma ... nó, możno niy tak blank rano, bydzie wele połednia, we ślypiach ćmi mi sie jak sto diosków i moty ciyngiym furgajóm a szczyplawo chobych bez śtyry godziny durch gawcół sie we szwajsaparat, lynzyk nikiej zola z tryjtków a we gymbie smrodlawo chobych złyknół trzi tydnie niyprane fuzekle. Ku tymu we gowie briwy i cukrówy rómplujóm choby fto na szlagcojgu grôł.
Co tam byda wiela tuplikowôł. Przeca kôżdy porzómny chop to miarkuje. I tyż styknie, co rzykna, iże Bercik przipytôł mie na abszicfajer swojigo synka, kiery sie za dwa tydnie bydzie żyniół. Nic, ino cowiekowi sie zdô co zarôzki wykopyrtnie, świtnie abo ... dokulwito sie do Pyjtrowego szynku na piwo.
Łorôz glingo telefółn. Ludzie! Choby fto ściep ze trzecigo sztoku ze piytnôście piyrwyjszych kanków na mlyko. Abo, choby praskli żeleźnianne dźwiyrze we werku. Chnet umrzitniynty, blank niy mónter biera te cedzitko do dakla ... ale ze daleka, coby mi palica niy pukła ...
– Halo! Klinika ...?
– Jezderkusie! Jakô klinika? Cowiek niymocny, po chopsku, po gorzôle, ale coby zarôzki ci ze lazarytu glingali?
Ciepnółech dyć cedzitko na widołki i biera sie coby jakisik ómszlag sie na łeb prziflostrować.
Drrr, drrr, drrr... zasik telefółn.
– Halo, halo! Klinika ...?
– A dyć dejżysz ty pierónie pokój ze tóm klinikóm, bo kiejbych cie scopiół, miôł sam cie przi sia, to jakbych cie prasknół bez pysk, to byś sie na isto swojimi szłapami deknół!!!
I juzaś gichnółech cedzitko na widołki. Kwilka pokój. Możno ci już niy bydzie cowieka tyn diosecki łochyntol szterowôł? Możno udo sie mi trefić zeltrówkóm do szolki, coby chocia ździebko do tego chyrtónia nakidać podwiyl niy lajstna sie sznapsa ze piwym.
Drrr, drrr, drrr ... biera ta suchôwka i już kca gizdowi nazdać choby świni do grotka aże suchóm a tu Bercik zachrapociałym głósym, sztimóm choby tyn côłki Armstrong gôdô:
– Ojgyn, niy łodkłodej, doczkej kwilka. Jô cie ino kciôł spytać eźli szlukniesz jakigosik maluśkigo ... „klinika”?
Brak komentarzy:
Prześlij komentarz
ojgyn@interia.pl