Trefiółech ci na naszyj Krojcce jednego kamrata, modego chopa ale już żyniola. Stôli my tak kwilka wele szynku i łorôz tyn karlus pytô mie rajn i łobiycuje postawić laga biyru i sznapsa. Czamu niy, myśla sie, chocia niy za tela miarkuja ło czym by my to tyż mógli ze sia do kupy pogodać. Nó ale ida śniym rajn do pyjtrowyj knajpy, siadómy za tiszym, Walek – tak mu łojce na krzcie dali – razym sztaluje po secie i po zajdlu piwa ... Kiej już szluknół i gorzôłecki, i piwa Walek napoczynô gôdać:
– Wiysz Ojgyn, jo ze tóm mojóm Ernóm przida chnet ło gowa ...
– Eeee tam, Walek, cóż tyż to za pierdoły mi sam łoprawiôsz? Przecamć dziepiyro trzi tydnie żyniaty, to co jô móm dziepiyro pedzieć po śtyrdziystuch latach?
– Wiysz Ojgyn, łóńskigo tydnia niy poradziółech ci jakosik nynać. Ciyngiym żech sie cuciół i cosik mi sie zdało we chałpie niyrichtik ...
– A cóż tyż to bóło u cia niyrichtik – pytóm sie go opaternie, bo możno jakiesik UFO ujzdrzôł abo co.
– Wylazuja Ojgyn do badycimra a sam przicupniyntô na ryczce siedzi moja Erna ...
– Nó, i ...
– Erna, wołóm, co ty sam porabiôsz? Tak niyskoro, a ty niy śpisz?
– Wachuja Walek ... praniô! – łodpedziała mi Ojgyn moja Erna.
– Jako to? Iże co? Wachujesz tego praniô, coby je wyjmnóńć ze waszmasziny kiej sie łóne upiere?
– Niy Walek, łóne już jes wyprane, jô je wywiesióła. Terôzki siedza przi troknerze i wachuja coby gynał wyschło.
– Przewrôcôsz je, coby gibcij wyschło?
– Niy! Przecamć ci gôdóm, iże ino wachuja, a niy iże przewrôcóm!
– Dziołcha niy gôdej, zicłaś sam i wachujesz? A niy mogesz pójńść do prykola spać i niych sie te pranie spróbuje same wyschnóńć?
– A po co, mój ty roztomiyły? Zawdy wachuja praniô, moja mamulka tyż wachowała jak schnie, i łóne wysychô, i wszyjsko jes do porzóndku.
– Nó tóż spróbuj dzisiôj niy wachować.
– Wiysz Walek, ty to ale môsz iptowatô lógika. Wszyjsko jes do porzóndku, móm łobadany szimel, tóż na kiego pieróna móm ekszperymyntówać? A bo to niy wiym, iże jak kca zrobić se tyju, tóż zawdy zaszltruja tyjkana i robia se tyj. I jes do porzóndku. Tóż móm terôzki spróbować niy zaszaltrować tyjkany i łoboczyć, co tyż z tego wyjńdzie?
– ....
– He,he, he tyj zawdy mi gynał wylazuje, kiej móm zaszaltrowanô tyjkana a pranie zawdy schnie ... kiej jô je wachuja, i tela!
Nó, musza pedzieć, coch blank bół we sztichu i niy poradziółech gynał nic tymu mojimu kamratowi łodpedzieć. Ja, ja ... jesce sie taki niy uplóncnół, coby spokopiół wszyjskie do łostatka ... baby, prôwda?
Brak komentarzy:
Prześlij komentarz
ojgyn@interia.pl