Ło „image” trza dbać ...

Boczycie to chopy? Dôwnij nierółz trza bóło zakludzić sie kajsik na sztela, kiej przi jakisik biysiadzie niy nastykło gôrzoły. Ta szpera na tyn machmol ... a to piyrszego i piytnôstego niy sprzedowali gorzôły, a to juzaś szło sie jóm ino lajstnóńć dziepiyro po piyrszyj po połedniu i take tam mecyje ...
Łozprawiôł mi niydôwno jedyn mój kamrat jak to bóło kielanôście lôt tymu nazôd kiej łón sóm bół festelnie „potrzebowski” i musiôł sie zakulwitać na ta sztela ... nó, nie spómna już kaj ...
– Wiysz Ojgyn! Sam kce sie sie słepać a wszyjske flaszki już do kna prózne. Nó, tóż kolyjny wander na sztela. Leberka dopolajóm ... to mie razinku blank niy dziwi. Ludzie słepióm take wynôlôzki ło kierych sie bali i filozofóm niy śnióło ...
– He, he terôzki to możno jesce barzij wymyślate „drinki” poradzóm wypokopić, prôwda?
Kamrat niy suchôł, ino cióngnie dalszij:
– Te wszyjske łonygdejsze sztele nigdy niy ustali mie przerôżać. We siyniach nigdy niy bóło światła, niy blyndowała żôdnô, choby ino maluśko fóncelka. Wlazuja ze jednym istnym do pomiyszkaniô. Pomiyszkaniô, to za tela pedziane. Driny kajsik kole piytnôście chopa. Dyliny sie klyjóm do zolów. Wszandy jakesik usrane talyrze ze niydojydzónymi podnostkami, abfalami. Muchy, szlajfer, cuch ... Dyliny, coby je wyszojrować, trza by je bóło przodzij podpolić. Szczewiki sie dó nijch flostrujóm. Lecy kedy myśla, iże jak zrobia nastympny szrit, to łostana bez szczewika.
– Ja, tak bóło ... sómech to niyrółz miôł przileżitość ujzdrzić – tupluja mu.
– ... Przelazujymy bez take pomiyszczyni, ftore ludzie zaobych mianujóm kuchynióm. Miasto dźwiyrzi we futrzinie wisi starô, sklabustrowano deka ... We izbie połoddziylane sóm take kamerki szranckami. To tak, choby izbetki. Przelazujymy wele jednego takigo boksu, a tam leży jakiś istny, ze brodóm łogrómnucnóm choby Rumcajs ze Jičina. Wele niygo leży półsago baba. Takô wyszczurzało choby śmiyrtka, styranô, strajtanô łod ankoholu. Lygajóm tak pół nage ... Przelazujónc wele, słysza jak ta baba rzóńdzi:
– Kurde mole ... wsto ... sto.. stowej chooo ..pie, bo jesce ink..ink.. sze pomyślóm, iże to ... ci hep ... jakosik „patologia” ...