Czegoś za tela....

Móm kamratów, kierzy sie dwa-trzi lata tymu nazôd wypuściyli – jak to sie kiejsik gôdało – na saksy do Irlandji. Krajzowali tyż drugda tam a nazôd miydzy Dublinym a Pyrzowicami. I rółz tyż wziyni ze sia do Polski na ausflug przi szlustydniu jednego skamracónego Ynglyndera Johna. A wiycie, co Ynglyndery majóm ci pierónym radzi roztomajte trinkgylagi, słepanie gorzôły we Polsce, bo i tónij, i daleko łod swojij staryj a to, iże Polôki – na tyn przikłôd we Krakowie abo we Katowicach i kaj tam jesce – majóm jich już pôłno rzić, blank jich niy szteruje. Tak tyż bóło ze kamratym mojich przocieli Johnym we łóńsko niydziela.
Côłkóm hormijóm przikludziyli sie do Katowic na jakisik kóncyrt do „Spodka” po kierym bóło na isto stopieróńskie słepanie, take, Wiycie, do umarciô. Na drugi dziyń dokulwitali sie wszyjske do Pyrzowic. Nasze chopcy, miarkujecie – jak to wszyjske Polôki – wytryjnowane a tyn Ynglynder Johny ... ze takim ci sakramynckim kacynjamrym. Styrcy taki wyzwyrtany na nice i łodprôwiô sie na tym flugplacu, dziyrżónc we gracy jak nôjsrogszy skarb półtoryjlitrowô flaszka mineralwaser.
– Do fligra możno wniyś ino śćwiartka wody ... nó, czegoś do słepaniô – pedziôł zecnióny flugplacowy gryncszuc, nasz wopista.
Johnymu na łoka mrzik blicnóło cosik we palicy ... opaternie sztartnół mu myślónek ... szpekuluje ... Niyszpasownie! Łeb jak kalfas, we palicy choby śtyry kónie łod Ceglarskigo rajtowali ... Usmolónie! Móm woda ... dobrze! Móm ci za tela tyj wody wedle przepisów ... Usmolónie ... ale idzie szczimać!
– To jô to terôzki z tyj flaszki wysłepia, wiela potrza – wypokopiół.
Tyn zecnióny wojôk ino kiwnół łebóm.
Johny fechtnół sie, spión sie we sia ze wszyjskich swojich siył, ze côłkigo serca ... nad szprajce żełóndka ... słepôł woda hersko.
Piół ... piół ... piół ... ślypia już blank wyblyscół, kiej prziszoł na to, iże łostała, tak na augynmas, razinku śćwiartka tyj wody.
– Now already well? Terôzki już dobrze? – spytôł sie tego zecniónygo.
Wojôk bliknół na niygo i rzyknół:
– Blank niy dobrze! Usmolónie!
– .....
– Idzie przecamć ło pojymnóść flaszki a niy wiela jes driny wody!!!