To mi sie przitrefióło jakiesik... nó, niy byda gôdôł gynał... lôt tymu nazôd. Wypuściyli my sie ze staróm na miasto... do masarza. Prostô dróga. Łóna sztopła przed jakimsik szałfynstrym... Mie to jes na isto blank egal, pyndaluja dalszij, bo przeca ida po wuszt i miynso do masarza. Przelazuja na drugô zajta... bydzie bliżyj. Łóna sie mazgrô i cosik szpekuluje skiż, iże sztyjc styrcy przed tym szałfynstrym. Kurwa! To cheba jubilyrz. Łodwrôcóm gowa... dróga przeca znô... jakosi ci mie ścignie. Ida przeca po wuszt i miynso!
Dognała. Jô szczynsny, bula już za ajsbajn, wuszt i wyndzónô szpekzajta.
– Po jakiymuś mi pitnół? – pytô moja starô.
– Róbmy fajrant ze sprawónkóma i pyndalujymy do dóm. – godóm. – Za dziesiyńć minutek skóńczy sie nasz czas na parkplacu.
– Ale jô ci kciała pokôzać szykownisty piestrzónek, kiery ci mi sie festelnie podobôł. Rócznica przeca chnetki.
Jezderkusie! Panika, sztres, powtórka ze historji. Strzydniowiycze, możno starożytniość. K..wa kiej? Blank niy bocza ...
– Łojyjku, to już rócznica? – rzna gupigo (zawdy mi to dobrze wylazowało). – A kiej tyż to, ha, ha, ha... hmmm...
Spokopióła. Kukła ci na mie ciynżkim weźrokym.
– We czyrwcu!
– Łoo, to już za pôra dni! Jedynôstego cheba?
Cicho, miasto kómyntôrza (przeca mogóm to dziecka czytać).
–Nó cooo? Pamiyntóm, iże we czyrwcu tego dnia bóła ci jakosik tragedyjô!
Rócznica jes 29-go?. W życiy niy przepómna. Sprawdziółech to we metryce ... naszygo ślubu!
Brak komentarzy:
Prześlij komentarz
ojgyn@interia.pl