Dló mie zawdy, jesce łod śpikola nôjbarzij gyszpantny bół tyn jedyn ze tych Trzech Króli, kiery sie Kacper mianowôł. Niy poradza spokopić, eźli to richtik bół wicny chop, abo możno łod czegosik blank inkszego sie te nasze ci kaspry i cudoki wziyni. A jô przecamć jesce bocza takigo, ftorego mianowali Kasper Ololo tela, co to jes juzaś blank inkszô bôjka.
Ale bół ci sam u nôs kiejsik dôwno taki fal. We tym naszym chorzowskim Tyjatrze Łozrywki, kiery jesce tyn łochyntol Szczepański za tego igloka Eda zbajstowoł, mieli wystowiać jakiesik jasełka, pastorałki abo możno jesce cosik inkszego. I jedna ci samtyjszô mamulka rzyko do swojigo synka:
– Suchej ino Kasperku, umyj se gryfnie kark, gynik, bo pójńdymy dzisiôj wrółz do tyjatru łobejrzeć takich kasprów, kierzi bydóm tam śpiywać i łozprawiać gryfneiste gyszichty, łogrôać jakiesik kómsztiki.
Kasperek szykownie sie wyszpluchtoł tela, co faterek, kiery miôł prziniyś bilety, wlôz ino na łoka mrzik do szynku i... ze tyjatru psinco.
Za jakiesik możno pôra dni gynał tak samo. Mamulka juzaś kôzała swojimu syneckowi Kasperkowi wyszojrować pychol i kark, coby na niym bakynbortów, rantu ze marasu niy bóło ale do tyjatru juzajś sie niy pokwanckali, bo tatulek bół przed geltakiym i na bilety niy miôł. Zarôzki ale po tatulkowym geltaku juzaś bół kasperkowy kark gryfnie wyszpluchtany, wyszojrowany ale – jak zawdy –cosik faterkowi juzaś wlazło we parada, nó i juzaś psinco ze tyjatru, ze tych wszyjskich kasprów na binie we tyjatrze.
Yntlich już tak po trzech tydniach tatulek erbnół te bilety, spatrzôł ci je; na isto pójńdóm. Mamulka juzaś ci zawołałatego swojigo synecka Kasperka i juzaś tyż ci mu przikozała, coby se tyn gynik gynał wyszojrowôł. A na to łozgzukany już jak sto diosków Kasper rzykô:
– Ja, ja niy ma ta dobrze. Juzaś sie kark wyszojruja, juzaś byda bez côłki tydziyń choby gupi tyrôł po placu ze umytym karkiym, coby sie symie kamraty na placu chichrali a ... do tyjatru zicher niy pójńdymy, pra?
Brak komentarzy:
Prześlij komentarz
ojgyn@interia.pl