Môcie już pôłno rzić roztomajtych ryklamów? Pewnikiym môcie! I to wszandy, we cajtóngach, radijoku, telewizyji i ... bez telefółn. Ludzie! Kukóm z rańca na jedna naszô telewizyjô (niy byda gôdôł ftorô, coby gupiylokóm tyż niy robić ... ryklamy). Bezmać ryklamy niy mogóm przekrôczać dwadziestuch procyntów we godzinie, znacy – dwanôście minutek. A sam tak: klyci jedyn redachtór ze redachtórkóm, same pierdoły. Zetwo to jakiesik dwie minutki i zarôzki ... ryklama ... piyńć minutek. Juzaś tyn istny wlazuje na wizjô, fandzoli dwie-trzi minutki (same ino pierdoły, bo wiela razy idzie powtôrzać ta samo wiadómość?) i zaytm ... piyńć minutek ryklam. Miarkujecie ło kim jô sam terozki gôdôł? Pewnikiym miarkujecie, na isto miarkujecie!
Ło cajtóngach niy byda gôdôł, bo zawdy tam idzie szkartka łobrócić i tela. Ale nôjgorszyjsze sóm ryklamy bez telefółn. Tak po prôwdzie chnet wszyjske już u nôs majóm mobilnioki ale kajniykaj fóngujóm jesce telefółny sztacijónarne. I śniymi jes nôjgorzij. Glingô tako berdyjô, cowiek myśli, iże wygrôł na jakisik loteryji, sómsiôd wkarowôł pod autok (dobrze mu tak, zawdy bół łoszkliwiec i mioł lepszô „bryka”), a możno szwigermuter kipła i bydzie srogi erb.
Niy, niy, i jesce rółz niy! To zwóni do wôs „kónzultant do sprawy” zrobiyniô swôs ipty, „doradca do sprawy” wciśniyńciô wôs za balek. inkszy kónzultant, ftory wôs kce napytać do jakiś szuli na prezyntacjô gôrków, sztepdeków, zegówków ze kamelij wôłny, „zdrowyj żywności” i inkszych podanych pierdół. Nó, tóż praskocie suchôwkóm ale ... co tymu jes winowatô ta suchôwka?
Wiycie łonegdaj zaglingôł ci dó mie łoszkliwie upiyrdliwy, namólny kónzultant, ftory mi łofiarowôł za psinco, darmowo kolyjny telefółn, nastympny mobilniok. Na dioska mi trzeciô abo szczwôrto kómórka? Bóło wczas ło szaroku, jô fest ściykły, boch na srogim kacynjamrze po wczorejszym gyburstaku kamrata ...
– Móm dlô wôs panoczku szykownisty, całbrowny forszlag – nowy mobilniok...
– Niy kca, móm to w dupie – łodpedziôłech mu deczko możno bucowatym sznapsbaritónym ...
– Ale na zicher niy kcecie panoczku nowygo mobilnioka za friko, ganc darmo?
– Niy, i jesce rółz ... niy! – łodrzykóm corôzki barzij łozgzukany.
– A możno dlô jakigo waszygo spółpracównika?
– Kurde na mole! Jô jes pynzjónista ... niy móm żôdnych arbajterów ...
– A możno dlô jakigosik familijanta?
– Łóne wszyjske majóm telefółny ... na moja łostuda ... bo ze Miymiec glingajóm zawdy w nocy, kiej już szykowniście nynóm ....
– A możno dlô wnuków?
I Wiycie, tu żech niy strzimôł i rzykóm:
– Możno bych i wzión, ale ... we mojij pywnicy, kaj jich trzimóm pod klucym ... niy ma razinku ... zasiyngu!!!
Łoka mrzik cicho .... pibiiiiiiiiiiip
Pociep żech suchôwka i czekóm terôzki na policjô ....
Brak komentarzy:
Prześlij komentarz
ojgyn@interia.pl