Niydôwno napoczli sie dlô dziecek feryje. Tak niyskoro na łodwieczerz jedna mamulka kukła do izby swojij ceruszki i ujzdrzała na zofie listecek we ftorym stôło tak:
Moja roztomiyłô Mamulko!
Yntlich mómy już szlus ze szulóm. Dló mie już na... zawdy. Łod pierónym dôwna przaja jednymu karlusowi i uzdalichmy śniym, co terôzki już na zicher drapsnymy łod łojców. Jô miarkuja, iże tobie by sie to niy zdało, ale łón ci jes taki całbrowny, taki szmelcich! Te jejigo wyżgane na ciyle łobrôzki, te wrajżóne bele kaj piestrzónki, ringi... A tyn jejigo motorcykel!
Ali (bo tak mianuje sie tyn mój szac) miyni, iże jazda na tym motorcyklu we chelmisku to stopieróński grzych. Tyn Ali jes na mojim pónkcie do łostatka pofyrtany, blank ferikt. Gôdô, iżech to jô go retła, bo tyn ankohol, to by go na zicher na łostatku zakatrupiół...
Aha..., i nôjważniyjsze! Bydziesz miała mamulko wnuka! Takôch jes rada! Kamrat mojigo Alego mô ci kajsik we lesie maluśkô drzewiannô chałupka. Jóm ino trza deczko wyrychtować, i niy ma we tyj chałpie ani światła, ani wody, ale to bydzie tyn nasz nowy dóm. I niy trôp sie mamulko! Bydymy mieli ze czego żyć. Tyn mój szac Ali mô fajnisty, wybórny pómys, szykownistô idyjô. Bydymy do kupy uprôwiać „marihuana” i sprzedôwać jóm na miyście. Mô ci być ze tego pieróńskô kupa pijyndzy! Takôch jes ci rada! Ino sie mamulko niy trôp, prosza! Chnetki już mi piźnie śtyrnôście lôt i na isto moga już przecamć dôwać na sia pozór. Móm ino nôdziyja, iże chnetki wypokopióm móndroki jakô szczypiónka na AIDS... Alymu by to festelnie mógło spómóc...
Twoja roztomiyło cerzicka!
Aha! Na łostatek! Wszyjsko to sóm duperszwancwe i belakwastry. Wszysko to jes jak wjechać ryczkóm pod łóżko!
Jeżech u Kristy, łoglóndómy telewizyjô, i grómy na kómputrze. A jô ci kciałach wystawić, iże sóm gorszyjsze zachy niźli tyn mój côjgnist, te moje cynzórki, ftore znôjdziesz na mojim nachtiszu! Kusiolki!
Brak komentarzy:
Prześlij komentarz
ojgyn@interia.pl